Ballade des dames du temps jadis
Mercredi 7 novembre2007
Dictes moy ou, n’en quel pays,
Est Flora la belle Rommaine ;
Archipiada, ne Thaïs,
Qui fut sa cousine germaine ;
Echo, parlant quant bruyt on maine
Dessus rivière ou sus estan,
Qui beaulté ot trop plus qu’umaine ?
Mais ou sont les neiges d’antan ?Ou est la tres sage Heloïs,
Pour qui chastré fut et puis moyne
Pierre Esbaillart a Saint Denis ?
Pour son amour ot ceste essoyne
Semblablement, ou est la royne
Qui commanda que Buridan
Fust gecté en ung sac en Saine ?
Mais ou sont les neiges d’antan ?La royne Blanche comme lis
Qui chantoit à voix de sereine,
Berte au grant pié, Bietris, Alis,
Haremburgis qui tint le Maine,
Et Jehanne, la bonne Lorraine,
Qu’Englois brulèrent a Rouen :
Ou sont ils, Vierge souveraine ?
Mais ou sont les neiges d’antan ?Prince, n’enquérez de sepmainne
Ou elles sont, ne de cest an,
Que ce reffrain ne vous remaine :
Mais ou sont les neiges d’antan ?François Villon (1431-1463)
Un peu de culture pour les smsiens qui viennent faire leurs devoirs ici.